「蟲蟲」慳得鬼祟

踏入暑假，又係外遊旺季！有個靚太 friend就同媽咪姐講，佢搭飛機去法國 shopping，撞到影圈阿姐「蟲蟲」一家呀。

當日情形係咁嘅，好鬼好眼嘅靚太 friend，去到登機閘口，一眼就見到平日做戲好搞笑嘅「蟲蟲」同老公，再拖住兩個細路坐咗喺一邊，成家都唔多出聲，好低調吓！好嘞，咁開始入閘，靚太 friend又八卦望吓「蟲蟲」，見佢成家坐喺度唔郁，心諗人哋明星坐頭等、商務，唔同我哋啲平民坐經濟位，係唔使咁快上機同人爭位擺行李嘅。點知靚太 friend上咗機，舒舒服服坐定定，架飛機就起飛之際，竟然見到「蟲蟲」一家急步上機！佢哋仲要特登由商務位專用登機口上機，再行返去經濟位坐低喎！靚太 friend話「蟲蟲」喺機上全程頭耷耷，粒聲唔出，似乎勁驚俾人認出囉。
查實呢，一家四口飛法國，坐商務嘅話要用成十萬，確係好鬼貴！明星慳家唔係罪㗎，下次唔使咁鬼祟啦，辛苦啲細路要呆等，又辛苦自己要整色整水。

邊個係「蟲蟲」？ 1.拍過電視劇 2.同大歌星拍過拖